ЎзЛиДеП: бизнес муҳитида қонунийлик ва адолат таъминланиши керак

Сўнгги йилларда тадбиркорликни қўллаб-қувватлаш, бизнес муҳитини яхшилаш ва хусусий мулк дахлсизлигини таъминлаш бўйича қатор ишлар қилинди. Бу, албатта, иқтисодиётнинг барқарор ривожланиши учун муҳим.

Лекин амалиётда айрим масалалар ҳалигача баҳсларга сабаб бўлаётганини кўряпмиз. Масалан, яқинда айрим ҳудудларда тадбиркорларга тегишли ташқи реклама воситалари, электромобилларни қувватлантириш қурилмалари ва бошқа енгил конструкцияли объектларни демонтаж қилиш ҳолатлари жиддий сўроқ остига қўйиляпти.

Бу ерда асосий савол: агар тадбиркорлар бу объектларни ўрнатиш учун белгиланган тартибда рухсатнома олган бўлса, кейинчалик уларни “ноқонуний” ёки “дизайн-кодга мос эмас” деган асос билан суд қарорисиз бузиш қанчалик тўғри?

Айнан шу масала юзасидан ЎзЛиДеП ўз позициясини билдириб, тадбиркорлик субъектларининг мулкини суд қарорисиз мажбурий демонтаж қилиш амалиётига чек қўйилиши кераклигини айтяпти.

Бундан ташқари, партия бунақа низоли масалалар фақат суд тартибида кўриб чиқилиши лозимлигини билдиряпти. Бу, менимча, тадбиркорлар ҳуқуқий ҳимоясини таъминлаш ва бизнес муҳитида ишончни мустаҳкамлаш учун жуда аҳамиятли.

@shokirjonov