Milliy statistika qo‘mitasi ma’lumotlariga ko‘ra, 2026-yilning yanvar–fevral oylarida O‘zbekistonda sog‘liqni saqlash sohasida ko‘rsatilgan bozor xizmatlari hajmi 3,55 trillion so‘mni tashkil etib, o‘tgan yilning mos davriga nisbatan 9,7 foizga o‘sgan.

Ushbu ko‘rsatkichlar mamlakatda tibbiy xizmatlar sifati va qamrovini kengaytirish, aholiga zamonaviy tibbiy yordam ko‘rsatish borasida olib borilayotgan islohotlar samarasini yaqqol namoyon etmoqda.

Hududlar kesimida tahlil qilinganda, Jizzax viloyatida sog‘liqni saqlash sohasida ko‘rsatilgan xizmatlar hajmi 80,8 milliard so‘mni tashkil etgani e’tiborga molik. Bu ko‘rsatkich viloyatda tibbiyot sohasini rivojlantirish, mavjud muassasalar faoliyatini takomillashtirish va yangi xususiy tibbiyot markazlarini tashkil etish ishlari izchil davom etayotganini ko‘rsatadi.

Respublika bo‘yicha sog‘liqni saqlash xizmatlarining 17,2 foizi tibbiy amaliyot va stomatologiya xizmatlariga, 30,7 foizi shifoxona muassasalari xizmatlariga, 52,1 foizi esa sohaga doir boshqa xizmatlar hissasiga to‘g‘ri kelgan.

Mutaxassislar fikricha, Jizzax viloyatida tibbiy xizmatlar hajmining o‘sishi aholi soni ortishi, zamonaviy diagnostika va davolash usullarining joriy etilishi, shuningdek, xususiy tibbiyot muassasalari faoliyatining kengayishi bilan bevosita bog‘liq.

So‘nggi yillarda viloyatda yangi ko‘p tarmoqli tibbiyot markazlari, xususiy klinikalar hamda ixtisoslashtirilgan shifoxonalar faoliyati yo‘lga qo‘yilmoqda. Bu esa aholi uchun qulay, tezkor va sifatli tibbiy xizmatlardan foydalanish imkoniyatini yanada kengaytirmoqda.

Ta’kidlash joizki, sog‘liqni saqlash sohasidagi bunday o‘sish ko‘rsatkichlari nafaqat iqtisodiy faollikning ortishi, balki aholi salomatligini muhofaza qilishga qaratilgan tizimli islohotlarning amaliy natijasidir.