Трамп ва Путин Венгриядаги сайловларда мағлуб бўлишди

Венгрияда парламент сайловлари бўлиб ўтди. Унда 16 йилдан буён мамлакатни бошқариб келаётган Виктор Орбаннинг «Фидес» партияси мағлубиятга учради.

Сайлов натижаларига кўра, мухолифатдаги «Тиса» парламентдаги ўринларнинг учдан икки қисмидан кўпроғини, демакки, конституциявий кўпчиликни қўлга киритмоқда. Бу ҳақда Венгрия Миллий сайлов бюроси маълумотлари асосида хабар қилинди.

Мухолифат партияси етакчиси Петер Мадьяр ўзининг Facebook* саҳифасида Орбан уни телефон орқали ғалаба билан табриклаганини маълум қилди.

Сайловлар арафасида АҚШ президенти Доналд Трамп Виктор Орбанни “ўзининг энг яқин дўсти” деб атаган ва сайловда унга омад тилаган эди. Шунингдек, оммавий ахборот воситаларида Россия Венгриядаги сайловлар арафасида Виктор Орбанни қўллаб-қувватлаш кампанияси учун катта маблағ ажратгани ҳақида хабарлар пайдо бўлган.

Маълумот учун, Венгрия бош вазири Виктор Орбан ўзининг россияпараст позицияси билан танилган. У Украинанинг Евроиттифоққа қўшилишига, шунингдек, иттифоқ томонидан Киевга 90 млрд евролик кредит ажратилишига фаол тарзда тўсқинлик қилиб келаётган эди.

@fayzboguz