Tapha Arsenaal garaa garaummaa qabxii Siitii waliin qabu gara 7tti guddisuuf taphatu
************************

Taphni Piriimiyer Liigii Ingilaand torbee 20ffaan har'a eegala.
Dursaan Liigichaa Arsenaal dirree isaatiin ala Boornimaawuz waliin galgala sa'aatii 2:30 irratti ni taphata.

Walakkaa torbee darbe kana Astoon Viilaa 4 fi 1n moo’achuun gara cimina isaa duraatti kan deebi’e Kilabni Kaaba Landan Arsenaal, injifannoo kana itti fufsiifachuuf taphni Istaadiyeemii Viitaaliitiitti Boornimaawuz waliin taphatu isa qoruu danda’a.

Arsenaal bara dorgommii darbe taphoota lama Boornimaawuz waliin taphate lamaanuu moo’achuun isaa ni yaadatama.

Arsenaal qaraa gartee qabxii sadarkaadhaan isatti aanee jiru wajjin qabu bal’ifachuuf tapha Boornimaawuz waliin taphatu kana irratti garuu, sababa miidhamaatiin Kiristiyaan Mooskeeraa, Riikaardoo Kaalaafiiyoorii fi Maaks Doowumaaniin kan hinhirmaatani.

Deekilaan Reeyis ammoo tapha kana irratti hiriiruu fi dhiisuun isaa hinmirkanoofne.

Taphoota Piriimiyer Liigii Ingilaand 6n darban walitti aansee taphatame irratti Boornimaawuz injifachuu hindandeenye.

Taphataan lammii Gaanaa Antoonii Seemeeniiyoo Maanchiister Siitiitti makamuuf waliigalteerra gahes, har’a tapha isaa xumuraa ni taphata.
Waaree booda sa'aatii 9:30tti ammoo Astoon Viilaan Nootiinighaam Foorest waliin taphata.

Taphoota birootiin, Biraayitan Barnileey waliin, Woolvis ammoo Weestihaam Yunaayitid waliin galgala yeroo walfakkaataa sa'aatii 12:00tti ni taphatu.

#EBC #ebcdotstream #EPL #Arsenal #bournemouth