የትራንስፖርት ዋጋ ላይ እስከ 20 ብር የሚደርስ ዋጋ ጭማሪ ተደረገ

በወቅታዊ የነዳጅ ምርቶች የችርቻሮ መሸጫ ዋጋ ላይ የተደረገውን የዋጋ ማስተካከያ ተከትሎ የትራንስፖርት ታሪፍ ላይ እስከ 20 ብር የሚደርስ ጭማሪ ማድረጉን የአዲስ አበባ ከተማ ትራንስፖርት ቢሮ አስታውቋል። ዛሬ ይፋ በተደረገው ጭማሪ የከተማ አውቶብስ አገልግሎትን ጨምሮ በሚኒባስ፣ በሚዲባስና የባጃጅ ትራንስፖርት አገልግሎት የሚሰጡ ተሽከርካሪዎችን የሚመለከት ነው ተብሏል።

ከነገ ጀምሮ ተፈፃሚ በሚሆነው አዲሱ የሚኒባስ ትራንስፖርት ዋጋ ከዚህ በፊት ከነበረው ታሪፍ ላይ እስከ 10 ብር እንዲጨምር ሆኗል። 25 ብር የነበረው የጉዞ ዋጋ ወደ 35 ብር ከፍ ብሏል። 7.6 እስከ 20 ኪሎ ሜትር ርዝመት የሚሸፍነው የ 45 ብር የጉዞ ዋጋ ወደ 55 ብር ከፍ ብሏል። 30 ብር የነበረው የጉዞ ታሪፍ ከነገ ጀምሮ 40 ብር እንዲሆን ተወስኗል። 15 ብር ይከፈልበት የነበረው ታሪፍ አሁን ላይ ወደ 20 ብር ተደርጓል። በሚኒባስ ተሽከርካሪ ከሁለት እስከ አምስት ኪሎሜትር የሚሸፍነው ጉዞ ከ 15 ብር ወደ 20 ብር ከፍ ብሏል።

የሃይገር እና ቅጥቅጥ የትራንስፖርት አገልግሎት ላይም በተመሳሳይ ሁኔታ ቀድሞ ከነበረው ዋጋ ላይ ከ 5 እስከ 10 ብር የሚደርስ ጭማሪ ተደርጓል። ዛሬ ይፋ የተደረገው የትራንስፖርት ታሪፍ ከፍተኛውን ጭማሪ ያደረገው የባስ ትራንስፖርት ላይ ነው። ከአርባ እስከ ሃምሳ ኪሎሜትር የሚሸፍነው የታሪፍ ዋጋ ከ 50 ብር ወደ 70 ብር ከፍ እንዲል ተደርጓል። 40 ብር የነበረው የጉዞ ታሪፍ 20 ብር ጨምሮ 60 ብር ገብቷል።

#Ethiopia #AddisAbaba #PublicTransportation #EthiopianNews #AmharicNews #EthioTube #Africa