መንግሥት የአዲስ ስታንዳርድ የበይነ-መረብ ሚዲያን አገደ

የኢትዮጵያ መንግሥት የአዲስ ስታንዳርድ የበየነ-መረብ መገናኛ ብዙኃንን አግዷል። የመገናኛ ብዙኃን ባለስልጣን ባወጣው መግለጫ የሚዲያው ምዝገባ ምስክር ወረቀት ከዛሬ የካቲት 17 ቀን 2018 ዓ.ም ጀምሮ መሰረዙን አሳውቋል።

"አዲስ ስታንዳርድ የበየነ-መረብ መገናኛ ብዙኃን የሚዲያ ስነ ምግባርን፣ የኢትዮጵያ ሕጎች እና የሀገርንና የሕዝብን ብሔራዊ ጥቅም አደጋ ላይ የሚጥሉ ዘገባዎችን በተደጋጋሚ በማሰራጨት ላይ ይገኛል" ሲል ባለሥልጣኑ ወንጅሏል።

"ይህ አደገኛ ተግባር" በኢትዮጵያ መገናኛ ብዙኃን ባለሥልጣን ሬጉላቶሪ ስራዎች የተረጋገጠ እና በዜጎች በርካታ ጥቆማና ቅሬታ ሲቀርብበት የቆየ ነው ተብሏል።

በዚህ ምክንያት ባለሥልጣኑ ይህንኑ ድርጊት በመመርመር አዲስ ስታንዳርድ የበይነ መረብ መገናኛ ብዙኃን "እንዲታረም እና ከአጥፊ አካሄዱ እንዲቆጠብ በተደጋጋሚ ምክር ሲሰጥ ቢቆይም ለመታረም ፈቃደኛ ሳይሆን ቀርቷል" ማለቱን ተመልክተናል።

በዚህ ውሳኔ ምክንያት ከዛሬው እለት አንስቶም የኢትዮጵያ መገናኛ ብዙኃን ባለሥልጣን የአዲስ ስታንዳርድ የበየነ-መረብ መገናኛ ብዙኃን የምዝገባ ምስክር ወረቀት እንደተሰረዘ እና ምንም አይነት የሚዲያ ፈቃድ እና እውቅና እንደሌለው ለሁሉም አካል ያሳውቃል ሲል ባወጣው መግለጫ አሳውቋል።

የኢትዮጵያ መንግስት በተመሳሳይ መልኩ የዋዜማ ራዲዮን እና ሮይተርስን ማገዱ ይታወሳል።

#Ethiopia #EthiopianPress #EthiopianMedia #EthiopianBroadcastingAuthority #EthiopianNews #AmharicNews #EthioTube #Africa #AddisStandard