Vertu lyuks buklanadigan smartfonni taqdim etdi

Brend yangi Alphafold smartfonini ilg‘or Hermes AI-agenti bilan birga namoyish qildi. Ushbu yordamchi ish jarayonlarini mustaqil boshqarishi, savdo ma’lumotlarini yig‘ishi va rahbarning ish jadvalini rejalashtirishi mumkin.

Buklanadigan smartfon 8,05 dyuymli ichki va 6,53 dyuymli tashqi egiluvchan ekran bilan jihozlangan. Qurilmadagi titan sharnir esa 650 ming martagacha buklanishga chidamli qilib ishlab chiqilgan.

Smartfon flagman darajadagi Qualcomm Snapdragon 8 Elite protsessorida ishlaydi. Qurilma simli va simsiz quvvatlashni qo‘llab-quvvatlovchi 6500 mA/soat sig‘imli kremniy-uglerod batareyasi bilan ta’minlangan.

Suratga olish uchun 50 MP asosiy kamera, 50 MP keng burchakli kamera va 5 MP teleobyektivdan iborat uch kamerali modul javob beradi.

Kompaniya o‘zining lyuks an’analarini saqlab qolgan — korpuslar alligator terisi, oltin va olmoslardan foydalanilgan holda qo‘lda yig‘iladi. Har bir gadjet ichida esa uni yig‘gan ustaning imzosi yashirilgan bo‘ladi.

Smartfon allaqachon sotuvga chiqarilgan. Narxlar buzoq terisidan tayyorlangan bazaviy versiya uchun $6800 dan boshlanadi, qimmatbaho materiallardan tayyorlangan individual model esa $43 800 gacha yetadi.