የኢትዮጵያ ንግድ ባንክና የአዲስ አበባ ከተማ መስተዳር ፋይናንስ ቢሮ በኢንተርኔት ባንኪንግ አገልግሎት አብረው ለመስራት የመግባቢያ ሰነድ ተፈራረሙ፡፡
• ስምምነቱ የቢሮውን የፋይናንስ ቁጥጥርና አሰራር ዘመናዊ ለማድረግ ይረዳል ተብሏል፡፡
*****************

በስምምነቱ ወቅት የኢትዮጵያ ንግድ ባንክ የሆል ሴል ምክትል ፕሬዝዳንት ዶ/ር እስክንድር አስፋው በሰጡት መግለጫ ባንካችን የዲጅታል ኢትዮጵያ ግብን እውን ለማድረግ ከተለያዩ ተቋማት ጋር እየሰራ እንደሚገኝና ይህ ስምምነት የዚሁ አካል መሆኑን ገልፀዋል፡፡

99 በመቶ የሚሆኑት የፌደራል ተቋማት የኢትዮጵያ ንግድ ባንክን የኢንተርኔት ባንኪንግ አገልግሎት ተጠቃሚ መሆናቸውን ተናግረው፣ የአዲስ አበባ ከተማ መስተዳድር የፋይናንስ ቢሮም የዚሁ አገልግሎት ተጠቃሚ በመሆኑ የሚሰጣቸውን አገልግሎቶች ዘመናዊና ቀልጣፋ እንደሚያደርግ ገልጸዋል፡፡

መስተዳደሩ በ119 ወረዳዎች፤ 600 ትምህርት ቤቶችና ጤና ጣቢያዎች ስም በኢትዮጵያ ንግድ ባንክ ያለውን ሂሳብ በተማከለ መልኩ በኢንተርኔት ባንኪንግ አገልግሎት ለማንቀሳቀስ ስምምነቱ እንደሚያስችል ዶ/ር እስክንድር አመልክተዋል፡፡

በአዲስ አበባ ከተማ መስተዳድር ምክትል ከንቲባ ማዕረግ የፋይናነስ ቢሮ ኃላፊ አቶ አብዱልቃድር ሬድዋን በበኩላቸው እንደተናገሩት በከተማው የሚካሄዱ በርካታ የልማት ስራዎችን የፋይናንስ እንቅስቃሴን 24 ሰዓት ለመቆጣጥርና ለማስተዳዳር የኢትዮጵያ ንግድ ባንክ የኢንተርኔት ባንኪንግ አገልግሎት ትልቅ ሚና አለው፡፡

ስምምነቱ ግልጸኝነትን፤ ተጠያቂነትንና ቀልጣፋ አሰራርን ስለሚያሰፍን የመስተዳድሩን የፋይናንስ ግቦች ለማሳካት የኢትዮጵያ ንግድ ባንክን ተመራጭ ማድረጋችን ትክክለጫ አካሄድ ነው ብለዋል፡፡

የኢትዮጵያ ንግድ ባንክ በውሃና የኤሌክትሪክ ፍጆታ ክፍያ፣ በትራፊክ ቅጣት ክፍያዎች፣ በቤት ልማት እና በሌሎች ዘርፎችም ከመስተዳድሩ ጋር በዲጅታል ባንኪንግ በኩል አብሮ እየሰራ ነውም ተብሏል፡፡

በኢትዮጵያ ንግድ ባንክ ባለፉት ዘጠኝ ወራት ውስጥ በዲጅታል ባንኪንግ አማራጮች በከ15.4 ትሪሊዮን ብር በላይ ገንዘብ መዘዋወሩ ታውቋል፡፡