Алматы зообағында үш кенгуру төлі дүниеге келді

Алматы хайуанаттар бағында үш жұп кенгуру төлдеді. Қазірше біреуінің ғана жынысы анықталған — қызыл кенгурудан еркек төл туған. Қалған екі сұр кенгурудың төлі енесінің қалтасында болғандықтан, жынысы әзірге белгісіз.

🦘 Зообақ мәліметінше, сұр кенгуру төлдері Лорд пен Лара, сондай-ақ Тик пен Линда жұптарынан туған. Лара алтыншы рет, ал Линда алғаш рет төлдеді. Еркек төл Мартин мен Марта атты қызыл кенгурулардан туған.

📍 Мамандардың айтуынша, кенгурудың тууы көбіне сырт көзге байқалмайды: жаңа туған төл өте кішкентай болып, бірден енесінің қалтасына кіріп алады. Сондықтан қызметкерлер оның туғанын тек біраз уақыттан кейін, қалтадан басын шығара бастағанда ғана аңғарады.

📝 Зообақ өкілдері жаңа туған кенгуруларға ат қоюға қала тұрғындары да қатыса алатынын хабарлады.