Иранда атып түсірілген америкалық әскери ұшақтың экипаж мүшесі құтқарылды

Америкалық шенеунік Азат Еуропа/Азаттыққа америкалық күштер 3 сәуірде Иранда атып түсірілген жойғыш ұшақтың экипаж мүшесі құтқарылғанын хабарлады.

Америкалық шенеуніктің мәлімдемесіне дейін бірнеше сағат бұрын Иран билігі АҚШ-тың әскери ұшағын атып түсіргенін хабарлап, онда болғандарды ұстап әкелгендерге сыйақы тағайындаған еді.

Бірқатар ақпарат құралдары құтқару операциясына арнайы күштердің қатысқанын жазды. Кей ақпаратқа қарағанда, ирандық әуе қорғаныс күштері Black Hawk тікұшағына зақым келтірген, алайда ол базаға орала алған. CBS дереккөздерге сүйене отырып, ұшқышты тікұшақ эвакуациялаған кезде тікұшақтың өзіне құрлықтан оқ жаудырылғанын хабарлады. Тікұшақтың экипаж мүшелерінің бірі жарақат алған. Десе де, базаға дейін ұшып бара алған.