НАТО елдері Трамптың Ормуз бұғазындағы блокадасына қатысудан бас тартты

Бірқатар еуропалық елдер Ормуз бұғазы арқылы кеме қатынасының қауіпсіздігін қамтамасыз етуге дайын. Алайда олар Дональд Трамп жариялаған теңіз блокадасына қосылудан бас тартты. Бұған дейін АҚШ басқа елдер де осы шараға қатысатынын мәлімдеген. Алайда НАТО-дағы одақтастар, соның ішінде Британия мен Франция бұл қадамды құптамады.

Оның орнына еуропалық елдер Ормуз бұғазын ашу бойынша балама бастама әзірлеуде. Осы аптада бұл мәселе «ниет білдірген елдер коалициясы» қатысатын жаңа конференцияда талқыланады. Макрон бұл миссияның тек қорғаныстық сипатта болатынын және қақтығысқа еш қатысы жоқ екенін атап өтті.

Еске салайық, Иран Ормуз бұғазынан тыс, теңізде танкерлерге жүктелген 160 миллион баррель мұнай жинақтаған. Бұл мұнайдың негізгі сатып алушысы – Қытайдың тәуелсіз мұнай өңдеу зауыттары. Сарапшылардың бағалауынша, егер тәуліктік көлем 1,8 млн баррель деңгейінде сақталса, бұл қор шамамен маусым айының ортасына дейін жетуі мүмкін.