ህዝባዊ ወያነ ሓርነት ትግራይ (ህወሓት) ዛሬ ማምሻውን ባወጣው መግለጫ፤ የኢትዮጵያ መንግስት በሰው አልባ አውሮፕላን “ድብደባ በመፈጸም” በትግራይ ሰራዊት አባላት እና በአካባቢው ባሉ በነዋሪዎች ላይ “ጉዳት አድርሷል” ሲል ወነጀለ።

ህወሓት በዛሬው ዕለት ለተባበሩት መንግስታት ድርጅት ዋና ጸሀፊ በጻፈው ደብዳቤ፤ “የድሮን ጥቃቱ” የፕሪቶሪያ ስምምነትን “በግልጽ የጣሰ ነው” ብሏል።

ፓርቲው ዛሬ ምሽት ባወጣው መግለጫም ይህንኑ የኢትዮጵያ መንግስት የፕሪቶሪያን ስምምነት “በግልጽ ወደ መጣስ ተሸጋግሯል” ሲል በደብዳቤው ላይ የጠቀሰውን አቋም አስተጋብቷል።

በኢትዮጵያ ብሔራዊ ምርጫ ቦርድ ህጋዊ እውቅናው ባለፈው ግንቦት ወር የተሰረዘው ህወሓት፤ የፕሪቶሪያ ስምምነት ለመጣሱ ማሳያ ናቸው ያላቸውን ጉዳዮች በመግለጫው ዘርዝሯል።

በአፋር ክልል የሚንቀሳቀሱ ታጣቂዎችን “በማደራጀት” እና “በማስታጠቅ” የኢትዮጵያን መንግስት የከሰሰው ህወሓት፤ ይህን የሚያደርገው “ትግራይን የማፍረስ” ስትራቴጂውን ለማሳካት እና የክልሉ ህዝብ “እርስ በእርስ እንዲጠፋፋ” በማሰብ እንደሆነም ወንጅሏል።

እነዚህን ታጣቂዎች በመጠቀም “ሌላ ዙር ጦርነት ለመክፈት”፤ የኢትዮጵያ መንግስት “ዓለም አቀፉን ማህበረሰብ ለማታለል ሰፊ የማደናገሪያ ስራ እየሰራ ነው” ሲል ህወሓት በመግለጫው ከስሷል።

ህወሓት በመግለጫው “በጥቂት ከዳተኞች የተታለሉ” እና “ሽፍቶች” ሲል የጠራቸው ታጣቂዎች፤ በቅርብ ጊዜ በራያ አዘቦ ወረዳ የከባድ መሳሪያ ተኩስ ከፍተው እንደነበር ጠቅሷል። ፓርቲው ለተመድ ዋና ጸሀፊ በጻፈው ደብዳቤም፤ “በፌደራል መንግስቱ ይደገፋሉ” ያላቸው ታጣቂዎች ባለፈው ሳምንት መጨረሻ ፈጽመውታል ያለውን ድርጊት አንስቷል።

🔴ለዝርዝሩ➡️ https://ethiopiainsider.com/2025/16616/

@EthiopiaInsiderNews