Остонада Туркий давлатлар ташкилоти бизнес-форуми бошланди

Қозоғистон пойтахти Остона шаҳрида Туркий давлатлар ташкилотига аъзо мамлакатлар иштирокида йирик бизнес-форум ўз ишини бошлади.

Форум Қозоғистоннинг “Атамекен” Миллий тадбиркорлар палатаси ҳамда Қозоғистон Ташқи савдо палатаси ҳамкорлигида ташкил этилган.

Тадбирда давлат органлари, савдо-саноат палаталари, халқаро ташкилотлар, инвестиция тузилмалари ва туркий давлатлар бизнес доиралари вакиллари иштирок этмоқда.

Ўзбекистон делегациясига Савдо-саноат палатаси раиси ўринбосари в.в.б. Одилхон Рустамов бошчилик қилмоқда.

Форум кун тартибидан саноат кооперациясини ривожлантириш, транспорт ва логистика йўлакларини кенгайтириш, рақамлаштириш ва савдо интеграцияси, янги инвестиция механизмлари каби масалалар ўрин олган.

Шунингдек, форум доирасида “Ягона ишлаб чиқариш, қишлоқ хўжалиги ва логистика платформаси”ни ишга тушириш масаласи муҳокама қилинмоқда. Мазкур платформа туркий давлатлар тадбиркорлари ўртасида тўғридан-тўғри ҳамкорликни кучайтиришга хизмат қилиши кутилмоқда.

Дастурдан пленар мажлислар, панель сессиялари ҳамда тадбиркорлар ўртасида B2B учрашувлар ҳам ўрин олган.

Telegram Instagram* Facebook* Youtube