अयि रसने मम रामरसारसधामरसारसिते सरसे मृतसमसाररसामृतसाररसालयमालयनामरसे रसय रसामरसां सरसां कुरु रामरसे श्रुतिसाररसे जय जय राम रमारमणालय शान्तिसुखालय कान्तिनिधे! ॥१॥ पदार्थः - अयि (मम रसने) रामरसस्य वारिधेः (आरसधाम्नः)रसेन आरसिते ! सरसे, (मृतम्(अतिक्रान्तं) समसाररसम् येन(अमृतसाररसेन) तादृशस्य) मृतसमसाररसस्य अमृतसाररसस्य आलयभूतस्य मालयस्य (लक्ष्मीसदनस्य) (भगवतः श्रीरामचन्द्रस्य) नाम (एव रसो यस्य तादृशि हे रसने) नामरसे, रामरसे (रामः रसः यस्य) श्रुतिसाररसे(श्रुतिसार एव रसो यस्य) त्वं रसां (धराम्) रसय अरसाम् (न विद्यते रसः यस्याम्) सरसां रामरसां कुरु ॥१॥ २.रविकुलभूतसुपूतसुभूपतिभालिविभासकभाधिपते रघुकुलगर्वितशर्वितगर्वितदानववृन्दनृपाब्धिमणे दशरथयज्ञफलागमनागमयज्ञनतागमयज्ञपते जय जय राम रमारमणालय शान्तिसुखालय कान्तिनिधे! ॥२॥ पदार्थः -रविकुले भूतानां सुपूतानां (पावनतमानां) सुभूपतिरूपभानां (नक्षत्राणां) अलिः (समुदायः) तस्य विभासकः भाधिपते(नक्षत्राधिपते हे रामचन्द्र), रघुकुले गर्वित (हे राम) शर्वितः(नाशितः) गर्वितदानववृन्दः (येन तादृश हे राम) नृपाणामब्धीनां मणे (हे राम), दशरथस्य यज्ञस्य फलेन दोआगमन  (हे राम) आगमयज्ञैः नत (हे राम) आमगयज्ञानां पते (हे राम) त्वं जय जय॥२॥ ३.दितितनयाकुलदेवकुलस्तुतदेव महाकुलभूतजने नतभवतापहराशुगचापधराशुगमारितदैत्यतते निजजननीक्षितबालकवक्त्रविशालचतुर्भुजरूपहरे जय जय राम रमारमणालय शान्तिसुखालय कान्तिनिधे! ॥३॥ पदार्थः- दिति तनयैः (दैत्यैः) आकुलेन देवकुलेन स्तुत देव (हे राम) महाकुले (रघुकुले) भूता जनिः यस्य, (तादृश हे राम) नतानां भवतापस्य हर (हे राम) आशुग(बाण) चापधर(हे राम) आशुगेन मारिता दैत्यततिः येन (तादृश) (हे राम) निजजनन्या(कौसल्यया) ईक्षितं बालकवक्त्रे विशालचतुर्भुजरूपं यस्य (तादृश हे राम) त्वं जय जय॥३॥ हरिहरवन्दितसन्दितदैत्यमुखप्रमुखाङ्ग शुभाङ्गमते नगतनयाप्रियभूतपतिप्रियभूपपतेखिललोकपते जनकसुतानुजशोभित शोभितकाननमानननेत्रयुते जय जय राम रमारमणालय शान्तिसुखालय कान्तिनिधे! ॥४॥ पदार्थः- हरिभिः (कपिभिः) हरेण च वन्दित, सन्दितम्(खण्डिम्) दैत्यमुखस्य (रावणस्य) प्रमुखाङ्गं  (शिरः) येन ( तादृश हे राम) शुभौ अङ्गमती यस्य (तादृश हे राम) नगतनयायाः (पार्वत्याः) प्रियो यः  भूतपतिः तस्य प्रिय(हे राम)  भूपानां पते अखिललोकपते (हे राम) जनकसुतानुजाभ्यां (लक्ष्मण) शोभित(हे राम) शोभिते काननमानननेत्रयुती(वनम्, मायाः लक्ष्म्या आननं नेत्रयुतिश्च) येन तादृश (हे राम) त्वं जय जय.॥४॥ कपिपतिसत्कृत सत्कृतसत्कृतसज्जनसत्कृतसत्यकृते कविवरकोकिलकूजितपूजित निर्जितगर्जितकोपगते शमदमपूरितभूरितपोरतभूसुरसेवननिष्ठरते जय जय राम रमारमणालय शान्तिसुखालय कान्तिनिधे! ॥५॥ पदार्थः - कपिपतिना (सुग्रीवेण) सत्कृत (हे राम) सद्भिः कृतं सत्कृतं यस्य (हे राम) सज्जनैः सत्कृता(पूजिता) सत्यकृतिः (सत्यकार्यम्) यस्य तादृश (हे राम) कविवरवाल्मीकिरूपकोकिलेन कूजितः पूजितश्च (हे राम) निर्जिता गर्जितस्य कोपस्य गतिः येन (हे राम) शमदमैः पूरितानां भूरितपोरतानां भूसुराणां सेवने निष्ठा रतिः यस्य (हे राम) त्वं जय जय॥५॥ Jay Shree Ram , Ramaramanastuti. #song #ram #love