Bolalarimizning kelajagi endi faqat dars va kitoblar bilan cheklanmaydi

“Kelajak muhandislari” xalqaro festivalida ko‘rganlarim meni chuqur o‘ylantirdi. Bu yerda bolalar shunchaki qatnashchi emas, ular allaqachon kichik ixtirochi, dasturchi va strategga aylanib bormoqda.

Robo futbol musobaqasini kuzatar ekanman, bu oddiy o‘yin emasligini darhol his qilasiz. 12–16 yoshli bolalar ikki kishilik jamoalarda robotlarni boshqarib, strategiya tuzib, bir-biriga raqobat qiladi. Bu jarayonda ularning fikrlashi, tez qaror qabul qilishi va jamoada ishlashi qanday rivojlanayotganini ko‘rish mumkin.

Eng qiziq tomoni, bu yerda faqat yerda emas, osmonda ham raqobat bor. Dronlar futboli va poygalari shu qadar ta’sirli o‘tadiki, go‘yo kompyuter o‘yini real hayotga ko‘chib o‘tgandek. Bolalarning ko‘zlaridagi qiziqish va hayajonni ko‘rib, bu yo‘nalishlar ularning kelajagiga qanday ta’sir qilishini his qilasiz.

Ona sifatida men uchun eng muhim xulosa shu bo‘ldi: bunday musobaqalar bolaning ichidagi iste’dodni ochadi. Kimdir texnikaga mehr qo‘yadi, kimdir yangi g‘oyalar o‘ylab topadi, yana kimdir jamoada yetakchilik qilishni o‘rganadi. Eng muhimi, ular o‘zini topa boshlaydi.

Bu shunchaki festival emas. Bu bolalar uchun katta imkoniyat, kelajakka ochilgan eshik.