Колумбия Венесуэла билан чегарани мустаҳкамлади

Колумбия ҳарбийлари 3 январь куни Венесуэла билан чегарада жойлашган Кукута шаҳрида патруллик қилди. Бу АҚШнинг қўшни мамлакат пойтахти Каракас ва унинг бошқа ҳудудларига берган ҳужумидан бир неча соат ўтиб содир бўлди.

АҚШ ҳаракатини Колумбия президенти Густаво Петро кескин қоралади.

Петро X ижтимоий тармоғидаги постида БМТ Хавфсизлик Кенгаши ва Америка Давлатлари Ташкилотининг фавқулодда мажлисини чақиришга даъват қилди ҳамда Кукута шаҳрида Ягона қўмондонлик пункти ишга туширилганини, «чегарада тезкор режа амалга оширилганини» билдирди.

Тун давомидаги зарбалар олдидан АҚШ томони президент Николас Мадурони “нарко-давлат”ни бошқаришда ва 2024 йилги сайловларни сохталаштиришда айблаган эди.

Венесуэла етакчиси бу айбловларни рад этиб, Вашингтон дунёдаги энг йирик нефть захираларига эга бўлган унинг мамлакати нефтини назорат қилишни кўзлаётганини айтган.

3 январь куни Мадуро ушлангач, АҚШ Бош прокуратураси унга нисбатан “наркотерроризм” мақсадида тил бириктириш айбловини қўйиб, у Америкада суд қилинишини маълум қилди.

Николас Мадуро — чап қанотдаги президент Уго Чавеснинг авторитар вориси — 2013 йилдан бери Венесуэла ҳокимиятида қолмоқда. Мамлакат мухолифати ва ҳуқуқни ҳимоя қилувчи ташкилотлар унинг режимини сайловларни сохталаштириш ва инсон ҳуқуқларини бузишда айблаб келади.

Мавзу тафсилотларини Озодлик билан бирга кузатинг!

ТЎЛИҚ МАТЕРИАЛНИ КЎРИШ УЧУН БОСИНГ