Германияликлар Трампнинг Венесуэлага аралашувидан хавотирда

3 январь куни Германия пойтахти Берлинда Reuters агентлиги суҳбатлашган одамлар АҚШнинг Венесуэлага ҳужум қилгани ва узоқ йиллар давомида ҳокимиятда бўлган автократик президент Николас Мадурони ағдаргани ҳақидаги хабарлар юзасидан хавотир ва норозилик билдирди.

«У хоҳлаганини қилаётгандек таассурот қолдиради. Ва менимча, шу сабабли жуда ёмон оқибатлар бўлиши мумкин. У ҳеч қандай қоидаларга амал қилмайди ва диктатордек ҳаракат қилади», — деди Ванесса Reuters’га.

«Менимча, бу навбатдаги Трампга хос иш, чунки у бунга қодир — у дунёдаги етакчи куч раҳбари. Улар унинг қаергача бора олишини, қай даражагача босим ўтказишини синаб кўришмоқда. Аммо бу нотўғри, глобал қонунларга қарши чиқмаслик керак, чунки улар бекорга яратилмаган. Лекин улар ўзларини ҳамма нарсага қодир деб ҳис қилишяпти», — деди франциялик меҳмон Рафаэль.

Айни пайтда АҚШдаги венесуэлаликлар Мадуронинг қўлга олинишини нишонлади.

Венесуэла ҳукумати 3 январга ўтар кечаси мамлакат АҚШ томонидан тажовузга учраганини маълум қилди.

АҚШ президенти Дональд Трамп эса ижтимоий тармоқдаги постида АҚШ томонидан “кенг кўламли зарба” берилганини, сўнгра Венесуэла президенти Николас Мадуро қўлга олинганини эълон қилди.

АҚШ Бош прокуратураси Мадурога нисбатан “наркотерроризм” мақсадида тил бириктириш айбловини қўйиб, у Америкада суд қилинишини билдирди.

АҚШ Лотин Америкасида бундай тўғридан-тўғри аралашувни 1989 йилда Панамага бостириб кириб, ҳарбий етакчи Мануэль Норьегани ағдарганидан бери амалга оширмаган эди.

Мавзу тафсилотларини Озодлик билан бирга кузатинг!

ТЎЛИҚ МАТЕРИАЛНИ КЎРИШ УЧУН БОСИНГ