Флоридаги венесуэлаликлар Мадуронинг қўлга олинишини нишонлади

Флорида штатидаги Дорал шаҳрида яшовчи венесуэлаликлар жамоаси аъзолари АҚШ томонидан Венесуэланинг узоқ йиллар давомида ҳокимиятда бўлган автократик президенти Николас Мадуронинг қўлга олинишини нишонлаш учун ёқилғи шохобчасида жойлашган машҳур El Arepazo ресторани олдида тўпланди.

Венесуэла байроғи рангларида кийинган одамлар қувонч билан бақиришди, плакатлар кўтаришди ва мамлакат миллий мадҳиясини куйлашди.

«Бугун адолат қарор топмоқда. Бугун ўз юртимиздан чиқиб кетишга мажбур бўлган барча венесуэлаликлар учун адолат қарор топмоқда, биз ким эканимизни намоён қилиш учун», — деди Доралдаги венесуэла жамоаси аъзоси Кирвин Суарес.

Тун давомида берилган зарбалар олдидан АҚШ Мадурони “нарко-давлат”ни бошқаришда ва 2024 йилги сайловларни сохталаштиришда айблаган эди. Мухолифат эса ушбу сайловда катта устунлик билан ғалаба қозонганини айтган.

Венесуэла ҳукумати 3 январга ўтар кечаси, АҚШ томонидан тажовузга учраганини маълум қилди.

АҚШ президенти Трамп эса ижтимоий тармоқдаги постида АҚШ томонидан “кенг кўламли зарба” берилгани, сўнгра Венесуэла президенти Николас Мадуро қўлга олинганини эълон қилди.

АҚШ Бош прокуратураси Мадурога нисбатан “наркотерроризм” мақсадида тил бириктириш айбловини қўйиб, у Америкада суд қилинишини билдирди.

Мавзу тафсилотларини Озодлик билан бирга кузатинг!

ТЎЛИҚ МАТЕРИАЛНИ КЎРИШ УЧУН БОСИНГ