Kogon tuman tez tibbiy yordam stansiyasining yangi binosi qurilib, foydalanishga topshirildi

Kogon tumanida sog‘liqni saqlash tizimini yanada takomillashtirish, aholiga ko‘rsatilayotgan tibbiy xizmatlar sifatini oshirish hamda tezkor tibbiy yordam tizimini zamonaviy talablar asosida rivojlantirish borasida izchil ishlar amalga oshirilmoqda. Ana shunday muhim loyihalardan biri sifatida Kogon tuman tez tibbiy yordam stansiyasining yangi, zamonaviy binosi qurilib, foydalanishga topshirilgani bo'ldi.

Mazkur yangi inshoot tuman markazida barpo etilgan bo‘lib, aholiga tez va sifatli tibbiy xizmat ko‘rsatish imkoniyatlarini sezilarli darajada kengaytiradi. Xususan, ushbu stansiya orqali tumandagi qariyb 87 ming nafar aholiga tez tibbiy yordam ko‘rsatish tizimi yanada samarali tashkil etiladi.

Yangi bino ikki qavatdan iborat bo‘lib, “Tashabbusli budjet” loyihasi doirasida 1 milliard 401 million so‘m mablag‘ hisobiga “Iftixor ta’mir qurilish” mas’uliyati cheklangan jamiyati quruvchilari tomonidan 10x15 metr hajmda bunyod etildi.

Stansiyada tibbiyot xodimlari, xususan tez tibbiy yordam brigadalari uchun qulay va zamonaviy ish sharoitlari yaratilgan. Shuningdek, fuqarolar uchun ham barcha zarur shart-sharoitlar inobatga olingan. Binoning ichki jihozlanishi zamonaviy mebel, kompyuter texnikalari hamda boshqa zarur vositalar bilan to‘liq ta’minlangan.

Bundan tashqari, stansiyada elektron avtomatlashtirilgan boshqaruv tizimining uzluksiz va samarali faoliyat yuritishini ta’minlash maqsadida telekommunikatsiya infratuzilmasi to‘liq modernizatsiya qilindi. Internet va aloqa tarmoqlari yangilanib, zamonaviy tarmoq uskunalari o‘rnatildi. Tez tibbiy yordam brigadalari esa zamonaviy planshet qurilmalari bilan ta’minlandi, bu esa chaqiriqlarni qabul qilish va ularga tezkor javob qaytarish jarayonini sezilarli darajada optimallashtiradi.

Yangi binoning tantanali ochilish marosimida tuman hokimi Otabek Qazoqov hamda Respublika tez tibbiy yordam markazi direktori Abduvoitjon G‘afurov ishtirok etib, o‘z nutqlarida mazkur inshoot hududda sog‘liqni saqlash sohasida amalga oshirilayotgan keng ko‘lamli islohotlarning amaliy ifodasi ekanini alohida ta’kidladilar.

Shundan so'ng ochilish marosimi doirasida ramziy qizil lenta mas'ullar hamda nuroniylar tomonidan tantanali tarzda kesildi. Ramziy lenta qirqilgach, yigʼilganlar binoda yaratilgan shart-sharoit bilan yaqindan tanishdilar.

|Kogon tuman hokimligi rasmiy kanali

Telegram | facebook* | Youtube

Nurafshon mahallasida futbol maydoni tubdan yangilanib, yangi sport inshootlari barpo etildi

Xabaringiz bor, Davlatimiz rahbari tomonidan mamlakatimizda yoshlarni jismoniy chiniqtirish, ularning sport sohasida qobiliyatini namoyon qilishlari uchun zarur sharoitlar yaratish yangicha tizimda amalga oshirilmoqda. Ayni sohadagi ishlarni jadal rivojlantirish va bu orqali tumanimiz yoshlarini respublika qolaversa jahon arenalarida yurtimiz bayrog'ini baland ko'tarishlariga zamin yaratish maqsadida Kogon tumanida ham sezilarli ishlar amalga oshirilmoqda.

Xususan, Nurafshon mahallasida joylashgan 1985-yilda qurilgan futbol maydoni shu paytga qadar qarovsiz qolib, achinarli holga tushganligi sababli tuman hokimligi hamda viloyat sport boshqarmasi tashabbusi bilan "Tashabbusli budjet" loyihasining 2025-yil 2-mavsum doirasida 1mlrd 500 mln so'm mablag' evaziga ko'rkam holga keltirildi. Jumladan futbol maydoni qayta ta'mirlanib, 1000 tomoshabin o'rniga ega o'rindiqlar o'rnatildi. Qolaversa, yugurish va yurish yo'laklari tashkil qilinib, yoritish tizimi yaxshilandi. Shuningdek zamonaviy 22x44 metr hajmdagi sun'iy qoplamali futbol maydoni hamda workout maydonchasi ham yangidan bunyod etildi.

Aytish joizki 2024-yilda hudud yoshlari sportning yunon-rum va milliy kurash yoʻnalishlari bilan shugʻullanish uchun sport kurashlari zali ham qurib foydalanishga topshirilgan edi. Ayni kunda bu maskanda 150ga yaqin yoshlar malakali trenerlar qo'l ostida professional sport bilan shu'gullanib kelishmoqda. Umuman olganda hudud yoshlari hamda aholisi uchun sport bilan shug'ullanishlari uchun barcha turdagi sharoitlar yaratildi.

Bugun, 6-mart kuni ushbu ko'rkam maskanga aylangan sport kompleksining tantanali ochilish marosimi bo'lib o'tdi. Ochilish marosimida tuman hokimi Otabek Qazoqov boshchiligidagi tuman mas'ullari, sport sohasi vakillari, hudud yoshlari hamda nuroniylar ishtirok etdilar.

Unda soʻz olgan tuman hokimi Otabek Qazoqov mamlakatimizda olib borilayotgan keng miqyosli islohotlarda sogʻlom va barkamol yosh avlodni tarbiyalash, jismoniy tarbiya va sportni rivojlantirishga alohida eʼtibor qaratilayotganligini alohida taʼkidlab, yoshlarni sport bilan muntazam shug'ullanishga chorladi.

Majmua yil davomida sportning turli yoʻnalishlari bilan shugʻullanish, musobaqalar oʻtkazish, yuksak malakali sportchilarni tayyorlash va eng asosiysi yoshlarimizni ommaviy sport turlariga keng jalb etishga xizmat qiladi.

|Kogon tuman hokimligi rasmiy kanali

Telegram | facebook* | Youtube