«Давлат хизматчиси, аввало, камтар бўлиши керак»

50 минг долларлик соати сабаб тармоқларда муҳокама марказида бўлган Шерзод Қудбиев изоҳ берди. Лекин унинг гапларида соатнинг қаердан олгани ва нархи ҳақида гап йўқ.

Урбанизация ва уй-жой бозорини барқарор ривожлантириш миллий қўмитаси раиси Шерзод Қудбиев сўнгги кунларда ижтимоий тармоқларда кенг муҳокама қилинган соат масаласига муносабат билдирди.

Унинг айтишича, сўнгги бир ҳафта давомида у билан боғлиқ муҳокамаларга ўз вақтида жавоб бериш имкони бўлмаган. Қудбиев бу ҳолат иш жараёни ва шахсан ўзи учун ҳам катта стресс бўлганини таъкидлаган.

“Бу соат мен учун жуда қадрли, кўп нарсани эслатади. Лекин қандай бўлишидан қатъи назар, давлат хизматчиси, аввало, камтар бўлиши керак”, — деди у.

Кудбиевнинг сўзларига кўра, айниқса йиғилишлар ва расмий учрашувларда давлат хизматчиси этика қоидаларига қатъий амал қилиши, ўзини камтар тутиши ва давлатга хизмат қилаётган шахс эканини намоён этиб бориши зарур.

У мазкур ҳолат ўзи учун жиддий хулоса бўлганини билдириб, келгусида ҳам фақат яхшилик ва Ватан равнақи йўлида ишлашда давом этишини айтди.

Шунингдек, Қудбиев блогерлар ва жамоатчилик билдирган танқидий фикрларни ўринли деб баҳолаб, бу каби муносабатлардан тегишли хулоса чиқарганини қайд этди.

Telegram | Instagram* | You Tube | Facebook* | X