Аёллар терма жамоамизнинг етакчи вакиласи,жаҳон кубоги соҳибаси Навбаҳор Ҳамидова профессионал боксда иккинчи жангини ўтказиши маълум бўлди. У 11 апрель куни Фарғонада Фарангиз Олимжоновага қарши рингга кўтарилади.

Биз ушбу жанг ҳақида боксчимиз ва аёллар терма жамоаси бош мураббийи Элшод Расуловнинг фикрлари билан қизиқдик.

- Элшод Навбаҳор учун асосий мақсад барибир 2028 йилги Лос -Анджелас Олимпиадасидаги муваффақиятли иштирок ҳисобланади. Профессионалдаги фаолият унга халақит бермайдими?

- Йўқ. Аксинча оралиқ вақт бўлганда бундай жангларни ўтказиб туриш зарар қилмайди.

- Профессионал ва ҳаваскор бокс ўртасида барибир фарқ бор. Ҳозирги тайёргарлик ҳаваскор йўналишга қаратилганлигини инобатга олсак, қийинчилик юзага келмайдими?

- Рейтинг жанглари учун ушбу тайёргарлик етарли деб ўйлайман. Лекин жиддий жанглар, чемпионлик баҳслари учун алоҳида ҳозирлик кўриш керак бўлади.

- Навбаҳор Дана Уайтга қарашли бўлган Zuffa Boxing билан шартнома имзоладими?

- Навбаҳор ҳамда Азиза Зокировага қизиқиш билдиришган. Бу борада ишлар олиб бориляпти.


-Навбаҳор, профессионал боксда дебют жангингизни ўтказиб улгурдингиз. Бу йўналишга мослашиш қийин кечмадими?

- Эндигина битта жанг ўтказдим. Ҳозирча бирор фикр билдира олмайман. Лекин мураббийларимнинг кўрсатмаларини тўлиқ бажаришга ҳаракат қилдим. Шунинг учун қийинчиликка учрамадим. Ҳали жиддий жанглар олдинда.

- Жиддий жанглар деганда қандай тоифадаги рақибаларингиз билан тўқнашувни назарда тутяпсиз?

- Албатта, профессионал боксдаги чемпионларга қарши тўқнашувни айтяпман.

- Демак, бу йўналишда ҳам исталгани билан жанг қилишга тайёрсиз?

- Шубҳасиз, мен рақиб танламайман!

-Раҳмат, профессионал боксда ҳам чемпионлик камарларини қўлга киритишингизга тилакдошмиз!

ОБУНА БЎЛИНГ��BoxingUzbekistan