Банкларда харажатни ходимлардан эмас, натижа бермаётган экспатлардан тежаш вақти келмадими?

Сўнгги йилларда айрим банклар хорижлик экспат мутахассисларни жалб қилиш учун катта маблағ сарфламоқда. Бу, албатта, нотўғри эмас. Агар экспат ўз тажрибаси билан банкка янги технологиялар, замонавий бошқарув ёндашувлари ва сезиларли молиявий натижа олиб келса, бундай инвестиция ўзини оқлайди.

Аммо ҳар қандай катта харажат каби, экспатларга тўланаётган юқори маош ҳам аниқ натижа билан баҳоланиши керак. Агар кутилган самара бўлмаса, фақат хорижлик экани учун катта маблағ сарфлашнинг ўзи ташкилотга қиймат яратмайди.

☑️ Шу билан бир вақтда айрим банкларда харажатларни қисқартириш оддий ходимларнинг маоши ёки ижтимоий имтиёзларини чеклаш ҳисобидан амалга оширилмоқда. Ваҳоланки, ташкилотнинг энг катта бойлиги — унинг малакали ходимларидир. Улар кетса, ўрнига муносиб кадр топиш, тайёрлаш ва мослаштириш кўпинча тежалган маблағдан ҳам қимматга тушади.

☑️ Шунинг учун харажатларни оптималлаштириш энг аввало энг катта харажат қилинаётган йўналишлардан бошланиши керак. Юқори маош олаётган ҳар бир экспат банкка қандай қиймат қўшаётгани ва унинг фаолияти қандай натижа бераётгани мунтазам баҳоланиши лозим.

☑️ Айниқса банкнинг энг юқори бошқарув органи ва топ-менежментига экспатларни тайинлашда жуда эҳтиёткор бўлиш керак. Чунки банкни бошқариш фақат халқаро тажриба билан чекланмайди. Раҳбар мамлакат қонунчилигини, Марказий банк талабларини, маҳаллий бизнес муҳитини, мижозлар психологиясини ва миллий корпоратив маданиятни чуқур англаши лозим. Бу омилларни яхши билмаган раҳбар ҳатто катта халқаро тажрибага эга бўлса ҳам, маҳаллий шароитга мос қарор қабул қилишда қийинчиликка дуч келиши мумкин.

☑️ Кўп ҳолларда маҳаллий мутахассислар айнан шу устунликка эга бўлади. Улар бозорни, рақобат муҳитини ва мижозларнинг эҳтиёжларини яхши тушунади. Шунинг учун айрим вазифаларда қиммат экспатни жалб қилишдан кўра, кучли маҳаллий кадрларга сармоя киритиш банк учун юқорироқ самара бериши мумкин.

Экспатнинг қадри унинг хорижлик экани билан эмас, банкка қўшаётган аниқ натижаси билан баҳоланиши керак. Агар катта харажат қилинса, унга яраша катта натижа ҳам бўлиши шарт. Акс ҳолда, энг тўғри инвестиция — маҳаллий шароитни яхши биладиган, масъулиятни ҳис қиладиган ва натижа бера оладиган кучли миллий кадрларга ишонч билдиришдир.

Каналга уланиш👉🏻 @Bankxabar