Paynet, Payme ва Click бир йилда қанча соф фойда олди ва қайси бири кўпроқ даромад қилди?

Ўзбекистоннинг учта йирик тўлов компанияси — Paynet, Payme ва Click 2025 йилни жами 1,16 трлн сўм соф фойда билан якунлади. Бир йил аввал уларнинг умумий фойдаси 850,9 млрд сўмни ташкил этган бўлса, 2025 йилда бу кўрсаткич 310,1 млрд сўмга ёки 36,4 фоизга ошди.

2025 йил якунларига кўра, энг кўп соф фойдани Paynet олди — 395,1 млрд сўм. Компания фойдаси 2024 йилдаги 281,5 млрд сўмга нисбатан 40,3 фоизга ёки 113,6 млрд сўмга кўпайди.
Иккинчи ўринни Payme эгаллади. Компаниянинг соф фойдаси 390,1 млрд сўмни ташкил этиб, Paynet натижасидан атиги 5 млрд сўмга кам бўлди. Payme фойдасини бир йилда 42,2 фоизга оширди ва уч компания орасида энг юқори ўсиш суръатини қайд этди.
Click эса 375,8 млрд сўм соф фойда билан учинчи ўринда қолди. Компания фойдаси 2024 йилга нисбатан 27,3 фоизга ёки 80,7 млрд сўмга кўпайди.

Қизиғи, бир йил ичида компаниялар ўртасидаги тартиб ўзгарди. 2024 йилда Click 295,1 млрд сўмлик соф фойда билан биринчи ўринда бўлган, Paynet иккинчи, Payme эса учинчи ўринни эгаллаган эди. 2025 йилда Paynet ва Payme юқорироқ ўсиш суръатларини кўрсатиб, Click'ни ортда қолдирди.

Тушум бўйича эса Paynet катта фарқ билан етакчилик қилди. Компаниянинг 2025 йилдаги соф тушуми 1,74 трлн сўмга етди. Payme'да бу кўрсаткич 769,7 млрд сўмни, Click'да эса 702,6 млрд сўмни ташкил этди.

Шу билан бирга, энг юқори соф фойда маржаси Click'да қайд этилди — 53,5 фоиз. Яъни компания ҳар 100 сўмлик тушумдан ўртача 53,5 сўм соф фойда олган. Payme'да бу кўрсаткич 50,7 фоизни, Paynet'да эса тахминан 22,7 фоизни ташкил этди.

Каналга уланиш👉🏻 @Bankxabar