Daladan bozorgacha bo‘lgan yo‘l

Joriy yilning 6-noyabr kuni qishloq xo‘jaligi fanlari doktori, akademik Namazov Shadman Ergashevich bilan “Sulton” g‘o‘za navining yaratilishi, patentlanishi, litsenziyalashtirilishi va tijoratlashtirilishi jarayonlariga bag‘ishlangan suhbat o‘tkazildi.

Mazkur nav ustida ilmiy seleksiya ishlari 1992-yildan boshlab olib borilib, natijada “Sulton” navi 2011-yil 14-yanvarda NAP 101 raqami bilan seleksiya yutug‘i sifatida davlat reyestriga kiritilgan. Patent huquqi Paxta seleksiyasi, urug‘chiligi va yetishtirish agrotexnologiyalari ilmiy-tadqiqot institutiga tegishli bo‘lib, nav mualliflari soni - 6 nafar.
Navning asosiy afzalliklari: kam suv talab qiluvchi sharoitlarga chidamlilik, turli iqlimga moslashuvchanlik, yuqori hosildorlik va sifatli tola berish ko‘rsatkichlaridir. Amaliyotda nav respublikaning bir qator hududlarida keng qo‘llanilib, Qozog‘iston va Qirg‘iziston davlatlariga eksport qilinmoqda. Institut va mualliflar tomonidan navni tijoratlashtirish natijasida katta miqdorda daromad olinmoqda.

Navning patentlashtirilishi va tijoratlashtirilishida “Intellektual mulk markazi” tomonidan:
• patent hujjatlarini rasmiylashtirish;
• ma’lumotlarni ixtisoslashtirilgan bazalarga kiritish;
• patent huquqlarining amalda amal qilishini tasdiqlovchi dalolatnomalarni rasmiylashtirish;
- tijoratlashtirish jarayonida axborot-metodik ko‘mak ko‘rsatish ishlari amalga oshirildi.

Telegram | Instagram* | Facebook* | YouTube | Bot