Чиқинди масаласи: сифатли хизмат ишонч ва масъулиятни кучайтиради


Вилоят ҳокимлигида Эркинжон Турдимов ҳузурида ўтказилган муҳокамада чиқиндиларни олиб чиқиш тизимидаги долзарб масалалар кўриб чиқилди. Ижтимоий тармоқлар ва мурожаатлар таҳлили шуни кўрсатдики, айрим ҳудудларда аҳоли бу хизматдан рози эмас. Айниқса, Гулистон ва Янгиер шаҳарлари, Ховос, Оқолтин ҳамда Сайхунобод туманларида бу борада эътирозлар кўпаяётгани таъкидланди.

Муҳокамада энг аввало аҳолига қулай ва аниқ ишлайдиган тизим яратиш зарурлиги қайд этилди. Шу мақсадда ҳар бир маҳалла ва кўча кесимида чиқинди олиб чиқишнинг аниқ графиги ишлаб чиқилади, ижтимоий тармоқлар орқали эълон қилинади. Махсус техника қачон келишини одамлар олдиндан билиши таъминланади.

Соҳа мутасаддиларига маҳаллалар тозалигини таъминлаш, аҳоли билан ишлаш маданиятини ошириш ва хизматни сидқидилдан ташкил этиш вазифаси қўйилди. Таъкидланганидек, қаерда хизмат сифатли йўлга қўйилса, ўша жойда аҳолининг тўлов интизоми ҳам мустаҳкамланади.

Шу билан бирга, контейнерлар етишмайдиган нуқталарни тўлдириш, полигонлар фаолиятини тартибга солиш, ҳар бир ҳудудга масъулларни бириктириш ва мурожаатларга тезкор жавоб қайтариш тизимини кучайтириш бўйича топшириқлар берилди.