🔸سەرچاوەیەکی ئاگادار لە کامێرانەوە لە وتووێژ لەگەڵ تۆڕی مافەکانی مرۆڤی کوردستاندا ڕایگەیاند کە ڕۆژانی ١٨، ١٩ و ٢٠ی بەفرانباری ١٤٠٤ (٨، ٩ و ١٠ی ژانڤییەی ٢٠٢٦) کاسبکاران و بازاڕیانی ئەم شارە بەتەواوی لە مانگرتندا بوون و دووکانەکانیان داخستبوو، شەوانیش خۆپیشاندان و گردبوونەوەی ناڕەزایی لەسەر شەقامەکان درێژەی هەبوو. بە وتەی ئەم سەرچاوەیە، لەو سێ شەوەدا هێزەکانی سوپای پاسداران بە چەکی جەنگی و ساچمەزەن دەسڕێژیان لە خۆپیشاندەران دەکرد. لە ئەنجامی ئەم دەسڕێژانەدا بە لایەنی کەمەوە ٥ کەس بە گوللەی جەنگی بریندار بوون و لانیکەم ٦ کەسی دیکەیش ساچمە بەر چاوەکانیان کەوت و بە سەختی بریندار بوون، بە جۆرێک کە چاویان لەدەست داوە. هەروەها دەیان برینداری دیکە لەبەر مەترسیی دەستبەسەربوون سەردانی ناوەندە پزیشکییەکانیان نەکردووە و لە ماڵەکاندا چارەسەر و دەرمانیان بۆ کراوە. سەرچاوەکە هەروەها زیادی کرد کە تا ئێستایش هێزەکانی سوپای پاسداران بە شەو لە شەقامەکانی شاردا بڵاوەیان پێ دەکرێت و لەم ماوەیەدا لانیکەم ٢٠ کەس لە لایەن هێزە ئەمنییەکانەوە دەستبەسەر کراون.

@KurdistanHRN