Наманган вилояти прокурори ёшлар билан очиқ мулоқот ўтказди
Наманган вилояти прокурори У.Мадрахимов томонидан Янгиқўрғон туманидаги «Ровот» маҳалласида ёшларни қўллаб-қувватлаш, уларнинг билим ва салоҳиятини юксалтиришга қаратилган навбатдаги тадбирлар ташкил этилди.
Тадбирда 80 нафардан ортиқ ёшлар, маҳалла еттилиги аъзолари ҳамда фаол нуронийлар иштирок этди.
Тадбир доирасида Наманган тажрибаси асосида амалга оширилаётган «Маҳалла устози» лойиҳасининг тақдимоти ўтказилиб, маҳаллада ёшлар билан ишлаш тизими, уларни касб-ҳунарга йўналтириш, бўш вақтларини мазмунли ташкил этиш, ҳаётда муносиб ўрин эгаллашига кўмаклашиш, шунингдек, ёшлар ўртасида ҳуқуқбузарлик ва жиноятчиликнинг олдини олиш борасида амалга оширилаётган ишлар ҳақида атрофлича маълумот берилди.
Шунингдек, маҳалла биносида ёшлар учун ташкил этилган, 1000 дан зиёд китоб жамланмасини ўз ичига олган янги кутубхонанинг очилиш маросимида иштирок этилиб, у фойдаланиш учун ёшларга топширилди.
Таъкидланганидек, мазкур кутубхона ёшларда китобхонлик маданиятини юксалтириш, мутолаага бўлган қизиқишни ошириш, уларнинг маънавий-интеллектуал салоҳиятини ривожлантириш ҳамда билим олишга бўлган интилишини кучайтиришга хизмат қилади.
Тадбир якунида ёшлар билан очиқ мулоқот ўтказилиб, уларнинг таклиф ва ташаббуслари тингланди.
Масъулларга билдирилган мурожаатларни ўз вақтида ҳал этиш ва ёшларни ҳар томонлама қўллаб-қувватлаш бўйича тегишли вазифалар белгилаб берилди.
Наманган вилояти прокуратураси.
__
Namangan viloyati prokurori yoshlar bilan ochiq muloqot oʻtkazdi
Namangan viloyati prokurori U.Madraximov tomonidan Yangiqoʻrgʻon tumanidagi «Rovot» mahallasida yoshlarni qoʻllab-quvvatlash, ularning bilim va salohiyatini yuksaltirishga qaratilgan navbatdagi tadbirlar tashkil etildi.
Tadbirda 80 nafardan ortiq yoshlar, mahalla yettiligi aʼzolari hamda faol nuroniylar ishtirok etdi.
Tadbir doirasida Namangan tajribasi asosida amalga oshirilayotgan «Mahalla ustozi» loyihasining taqdimoti oʻtkazilib, mahallada yoshlar bilan ishlash tizimi, ularni kasb-hunarga yoʻnaltirish, boʻsh vaqtlarini mazmunli tashkil etish, hayotda munosib oʻrin egallashiga koʻmaklashish, shuningdek, yoshlar oʻrtasida huquqbuzarlik va jinoyatchilikning oldini olish borasida amalga oshirilayotgan ishlar haqida atroflicha maʼlumot berildi.
Shuningdek, mahalla binosida yoshlar uchun tashkil etilgan, 1000 dan ziyod kitob jamlanmasini oʻz ichiga olgan yangi kutubxonaning ochilish marosimida ishtirok etilib, u foydalanish uchun yoshlarga topshirildi.
Taʼkidlanganidek, mazkur kutubxona yoshlarda kitobxonlik madaniyatini yuksaltirish, mutolaaga boʻlgan qiziqishni oshirish, ularning maʼnaviy-intellektual salohiyatini rivojlantirish hamda bilim olishga boʻlgan intilishini kuchaytirishga xizmat qiladi.
Tadbir yakunida yoshlar bilan ochiq muloqot oʻtkazilib, ularning taklif va tashabbuslari tinglandi.
Masʼullarga bildirilgan murojaatlarni oʻz vaqtida hal etish va yoshlarni har tomonlama qoʻllab-quvvatlash boʻyicha tegishli vazifalar belgilab berildi.
Namangan viloyati prokuraturasi.
Sayt |
Telegram |
Instagram* |
Facebook* |
X |
YouTube
