❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.

التواصل مع @ahmed_alziwar0

قناة خاصة بتلحين القصائد

@+PZwpTt2HLXcvUQZh

------------------------------------------------------

الوكت ماشاف لحضه راحمنه
وليالي  السود ابد ما  راحمنه
الباقر  شمل  زاهر   راحمنه
من الطف منهظم حد المنيه

الشاعر حسن لعيبي الحريشاوي

لاستشهاد الامام الباقر عليه السلام
سيد عماد الحسيني
الشاعر حسن لعيبي الحريشاوي

نعي
ابومهدي المسعودي
الشاعر حسن لعيبي الحريشاوي

لاستشهاد الإمام محمد الباقر عليه السلام

مهظوم مهموم الگلب مكسور حيل الخاطر
مفجوع ذبلان وغده ناحب حزين وحاير
علروح چن حال الأرض ليل المواجع داير
وعيوني تنظر  للسمه بيها الحزن موعابر
كلشي بهظم حال وشكل بلكون اشوفن صاير
البجروحه ظلت كربله  ولوعات يوم العاشر
الدين والحق والمجد. ينعى الامام الصابر
والعلم واحكام الفقه.   وَدَّع النور الزاهر
شجره انكسر منها غصن سابع غصنها الطاهر
اتباع الضلاله والظلم.   سَمَّوْا أمامي الباقر

الشاعر حسن لعيبي الحريشاوي

لاستشهاد الامام محمد الباقر عليه السلام
يابحر الفضل  (وزن نصاري )

يابحر الفضل يامنبع النور
بعيوني المدامع لجلك تفور
يبو الصادق يمظلوم
اليوم الدين مهظوم
بعيوني المدامع لجلك تفور
★★★★★
يانور الهداية وشمعة الدين
ياثاني بدر من  نور الحسين
لجلك كل جرح يندار جرحين
يامنهل عذب شفت الأمريين
يبوالصادق يمولاي
يبن الماشرب ماي
يوم الطف غريب وگلبه مكسور
★★★★★
كلمن حاربك وانت السلامه
مايجني ابد غير الندامه
شخصك من سطع نور الامامه
شالوا حقد عدوان الكرامه
كلمن حاربك صار
حطب ملموم للنار
وعلى الباغي النوايب لازم ادور
★★★★★
يلبطف شفت مولانا لوعات
من عدوان ماترحم وشمات
عساكر للعلم نظمت حملات
نهج حسين شامخ بيك مامات
تشهد دوم الايام
عزمك يبني الاسلام
وعلم آل النبي بكل بلد منشور
★★★★★
الطمعوا بالمناصب والإمارات
المعارف شافت من الگوم ويلات
صارت بس عناوين وشعارات
گضيت ايامك وياهم معانات
صاروا حرب للدين
گوم الذبحوا حسين
أمية بچفها صار الدين منحور
★★★★★
ينعاك الشرع والدين مولاي
ياطيب عهد للخلگ وفاي
الناس بدون رايك مالهم راي
بيك الموت عنهم صار حداي
الصادق عاش الايام
بعدك حزن وآلام
گلبه من القهر واللوعه مفطور

الشاعر حسن لعيبي الحريشاوي

لاستشهاد الامام محمد الباقر عليه السلام

اتعَلَمِت من الامام الباقر
اقتدي بنهج الرسول الطاهر
★★★★★
اتعلمت من العلِم راي وقرار
وصِفَه كون يصير مو صوره وشِعار
وفهمَّاني العلم للجنه منار
وبالمعارف مايخيب الذاكر
اتعلمت من الامام الباقر
★★★★★
عَلِمَّاني الباقر القول الصريح
وابد ماامشي بطريق الموصحيح
ومااميل الريح سوده ولا اطيح
ومااعيش بذلَّه عمري وحاير
اتعلمت من الامام الباقر
★★★★★
قدوتي الاطهار اصحاب الكساء
وتسعه من ولد الحسين الاوصياء
خذت عزمي من نوايب كربلاء
شماتمر بيه النوايب صابر
اتعلمت من الامام الباقر
★★★★★
عَلمَّاني ما اهاب المستحيل
لاي درب بيه ذِلَّه لو شر ما اميل
وابقه صاحب موقف وصاحب دليل
وبالشدد عندي الجواب الحاضر
اتعلمت من الامام الباقر
★★★★★
عَلِمَّاني الباقر القول السديد
وصار تحقيق الاماني موبعيد
بمنهج العباس وحسين الشهيد
السطرووها ادروس يوم العاشر
اتعلمت من الامام الباقر

الشاعر حسن لعيبي الحريشاوي

وَسَّع دورها المدرسه الفكريه
وفتح بيبانها المعرفه الدينيه
وقواعد للفقه تزهي  بمساعيَّيه
تحدَّه الظالم وزمرته القمعيه
تهل انواره من الباري قدسيه
للباقر علوم الخلک  مَحنيَّه
لمن  قادها ثورته العلميه
يا ريح التهز  روحه  الحسينيه

((شلون الريح تهزه الماخذ علمه من السجاد  ))

الشاعر حسن لعيبي الحريشاوي

لاستشهاد الامام محمد الباقر عليه السلام

إمامي وسيدي الباقر
يبن المصطفى الطاهر
إمامي وسيدي الباقر
★★★★★
الحكيم العالم العابد
الوجيه العارف القائد
الكريم الطاهر الماجد
على بلوه الزمن صابر
إمامي وسيدي الباقر
★★★★★
البليغ ونافذ الكلمه
الهادي الداعي للحكمه
وجودك للخلگ نعمه
سيف المعرفه الباتر
إمامي وسيدي الباقر
★★★★★
شكثر شايف غصص مره
الطفوف او وقعة الحره
يمن هز الجبل صبره
ولاعاش العمر حاير
إمامي وسيدي الباقر
★★★★★
استبداد وعذاب وشر
أمية بالظلم تفخر
متريد العلم يزهر
يلعلمك يضل زاهر
إمامي وسيدي الباقر
★★★★★
تهل لمصابك ادموعي
مصابك هوه موضوعي
الك تتوجر ضلوعي
يگلب الذاب بالعاشر
إمامي وسيدي الباقر

الشاعر حسن لعيبي الحريشاوي

بيعة الغدير (وزن المثلث  ثلاث ارباع الشيعتي )

حجة التوديع نزلت بيها آيه
بحق علي الكرار واعلان الولايه
علي للهادي وزير
نزلت بيوم الغدير
بحق علي الكرار واعلان الولاية
★★★★★
اثلث نعم انزلهن الباري برحمته
أكمال دينه وعلارض تمت نعمته
ورضا بالاسلام  للناس بحكمته
بالغدير الموعد ويامحله وكته
آيه من رب الانام
باعظم حروف وكلام
بحق علي الكرار واعلان الولاية
★★★★★
حجة التوديع مايخفه خبرها
نقش بالتاريخ مايرحل اثرها
آية من رب السمه الهادي نشرها
دوم مادام الدهر باقي عمرها
آيه ينقلها الرسول
بحق علي عنها يگول
بحق علي الكرار واعلان الولاية
★★★★★
هذا عيد الله الچبير الماله ثاني
أمر من الباري مو فكره وأماني
تبادلت بيه الخلگ اغله التهاني
ولايته وحبه يضل احله المعاني
أمر من الله صريح
نزلت بقول الفصيح
بحق علي الكرار واعلان الولاية
★★★★★
نزل جبريل بأمر رب البريه
يامحمد بلغ بهاي القضيه
ابولاية حيدره حامي الحميه
ولاتخاف اهل العقول الناصبيه
نزلت بهذا النداء
آيه من رب السماء
بحق علي الكرار واعلان الولاية
★★★★★
من لطف رب السمه علينه ونعيمه
المائدة وآيات هلسوره الكريمه
سبعه وستين آيتها العظيمه
الخالف الآيه النبي باچر خصيمه
آيه من ربنا القدير
نزلت بيوم الغدير
بحق علي الكرار واعلان الولاية

الشاعر حسن لعيبي الحريشاوي

مااعذر الروح الماتون دوم
وعين المايهل لجلك دمعها
موعابر حزنها يبوالسجاد
الحزن من روحي صار ومن طبعها

الشاعر حسن لعيبي الحريشاوي

❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.

التواصل مع @ahmed_alziwar0

قناة خاصة بتلحين القصائد

@+PZwpTt2HLXcvUQZh

------------------------------------------------------

لوردت فوز واجر بين العباد 🚩
جود بدموعك على مصاب الجواد

لاستشهاد الإمام محمد الجواد عليه السلام  ٠موشح

للمدينه بهلخبر ياهو اليروح 
يخبر اهل البيت بالصار وينوح
★★★★★
للمدينه من يروح بهلخبر
ابوالهادي لاحته اچفوف الخطر
غصن من شجرة المختار انكسر
انكسر غصن الچان باطيابه يفوح
★★★★★
بعزم ثابت لونحل منه الجسم
بين غربه وجور مالان العزم
طبع بالمامون طبع    المعتصم
وروح بالشر ماتخالف طبع روح
★★★★★
من يخبر الهادي بالقول الصحيح
ثلث ليالي  والده بعلته طريح
مثل جده الطاح علغبره ذبيح
والنوايب ماجلت عنه تلوح
★★★★★
ال هاشم وينكم يهل الفرض
يشهر الصارم عليهم يعترض
ومثل طي السجل يطويها الأرض
على الواضح بعد ماحاجه الوضوح
★★★★★
بغدر گامت  سمته ام الفضل
والغدر منها جذوره والأصل
لااهل ناطر دمع عينه يهل
علامام اجروح زادت علجروح
★★★★★
وين يهل العزم واهل الموزمه
اليوم بيه الدنيا صارت مظلمه
فوگ سطح الدار مهجة فاطمه
لله والكم شكوته بيها يبوح

الشاعر حسن لعيبي الحريشاوي

يمن دار الوكت ضدك تجهله
بحاجاتك لبوالهادي تجهله
الجواد ابسم گضه وناطر تجهله
   بعيد اهله ولا بالاهل جيه

الشاعر حسن لعيبي الحريشاوي ✍️

لاستشهاد الامام محمد الجواد عليه السلام
(وزن الدارمي )

بضلوعي شبت نار  لوعة مصابه
أبن الرضا سموه      بأول شبابه
★★★★★
أبچي على البلكون  تبچيله الاملاك
وگفت بحيره أليوم محبوسه الافلاك
ياگلبي ظل مهموم   وابچي على مولاك
لجله الشرع مفجوع   نهجه وكتابه
★★★★★
زادوا بني العباس   جور واذيه
اكثر ظلم  وإجرام   من آل أميه
مقصدهم يعذبون   ولد الزچيه
ابدور السمه الصافيين واهل النجابه
★★★★★
فاگد أبوه الچان  خيمه ومحنه
غربه ومواجع  شاف  من صغر سنه
بدار الغرب مهظوم  ماغمض جفنه
الفاگد اعزاز شلون   يخلص عذابه
★★★★★
لا  غفر رب الكون  إلهم ذنب يوم
الخلوه  عليل الحال   والچبده مسموم
إلهم عذاب النار   وكت الحشر دوم
المعتصم يوم الدين    شنهي جوابه
★★★★★
شنهي جوابه يصير  يوم القيامه
الخلاها  تلهب نار   چبدة أمامه
بحبل الكفر  والجور   چان التزامه
الخان الجواد النار  باچر أحسابه

الشاعر حسن لعيبي الحريشاوي

لشهادة الامام محمد الجواد عليه السلام( ملمع)
(وزن المثلث )

(جئت يبن الكرام ياامامي الجواد)
(باكيأ في خشوع. قد اقمت الحداد)
★★★★★
جيت انوح عليك ياتاسع العتره
ما اتيهن دربك يدليني عطره
يلي من عطفك ردت مولاي نظره
گلب المفارگ يظل ملتهب جمره

(لهفة في العيون لوعة في الفؤاد)
(جئت يبن الكرام. ياأمامي الجواد)
★★★★★
اعتله الشوگ الروح وجروحي لچمها
روحي لمصابك. ولايرحل هظمها
گاطع دروب السفر كّطعني همها
عرفت معنى الروح يمك من عدمها

(ليس لي من هجوع. ليس لي من رقاد)
(جئت يبن الكرام ياأمامي الجواد)
★★★★★
يبو الهادي من الرضا طبعه وصفاته
كملّت درب العلم ساعة وفاته
ناظرت كلمن اجاك ابمعظلاته
رجع متّحير عليه تاهت جهاته

(عصفت بي تدور عاتيات الوداد)
(جئت يبن الكرام. ياأمامي الجواد)
★★★★★
وين ابن اكثم نواياه اكشفتها
حرج نفسه والمسائل فسرتها
لهلسبب احقاد منهم واجهتها
كل نوايا المعتصم انته اعرفتها

( شره مستطير. شره بازدياد)
(جئت يبن الكرام ياأمامي الجواد)
★★★★★
عارف بحقك اجيتك معتنيلك
بين اشوفك سيدي وبين اشتكيلك
من زماني ومن ذنوبي انا دخيلك
اقبلني خادم سيدي واشكر جميلك

(ذاب قلبي أسى. وغدا كالرماد)
(جئت يبن الكرام. ياأمامي الجواد)

الشاعر حسن لعيبي الحريشاوي

لاستشهاد الإمام محمد الجواد عليه السلام.  ( ميمر)

وگفت جميع الافلاك.  تجري الدمع لغيابه
★★★★★
لايمه أهله    ولاقريب العنده
برض العدة تچوي المدامع خده
ارض المدينه موحشه من بعده
ماوصلت الاهله اخبار ومحد وصل يم بابه
★★★★★
محد گدر علدين       ينكر فضله
اصحاب واعادي   بالعلم تشهدله
باصعب مسائلها.  الخلگ ترجعله
عالم ابسر الرحمان. وكل مايخص اكتابه
★★★★★
الناظرك يقصد تنحرج من يسئل
يلگه الجواب بكل جهاته امفصل
يمك عواصيها    المسائل. تنحل
والحسب بيهن تحتار. خايب رجع بحسابه
★★★★★
عونك محمد يلمحمد جدك
يامن خزائن كل علومه عندك
أيدلي التحير بالمسائل ردك
الطالب علم من كل صوب. يمك يحط ارچابه
★★★★★
يبن الرضا للناس. يابو الهادي
من الضلاله للمعارف حادي
لمن لگيت الخلگ كلمن وادي
المعتصم راد  الموضوع  حالا تزول اسبابه
★★★★★
ام الفضل مثل الاهل عادتها
شمعة الدين.  بهلغدر طفتها
ايام جثه على السطح عافتها
لاعرفت بحاله الناس   لامن دروا احبابه

الشاعر حسن لعيبي الحربشاوي

بمناسبة استشهاد الامام محمد الجواد عليه السلام

شما لاگيت اخطار
ياشبل  الكرار
عزمك ماينهار   
★★★★★
تدريها   وياك الخلگ  ماتلتزم
تدريها   ماتملك اعنان العزم
تدريها   ايسيّر امرها المعتصم
تدريها   موبالعدد هيه الزلم

مابيهم احرار     
ياشبل الكرار
عزمك ماينهار
★★★★★
يدرونك   عزمك يبوالهادي خطر
يدرونك   بايعها روحك للخطر
يدرونك    عزمك ولايوم انكسر
يدرونك    ماهزتك ريح القدر

ومن هذا الاصرار.
ياشبل الكرار
عزمك ماينهار
★★★★★
عدوانك    من حيدر الهذا الوكت
عدوانك    شماعانى من شرهم شفت
عدوانك   رادوا عكس كلما ردت
عدوانك   الهم هدف تالي صرت

معروفه الادوار    
ياشبل الكرار
عزمك ماينهار
★★★★★
معروفه   تصير النوايا بهلشكل
معروفه  المابيها رحمه ولاعدل
معروفه  فكرة غدر صارت فعل
معروفه  اتنفذ الجريمه ام الفضل

من دون استنكار  
ياشبل الكرار
عزمك ماينهار
★★★★★
هلساعه  مرت على عيونك صور
هلساعه   چن الشمرگاطع  نحر
هلساعه   طايح گمر  يم النهر
هلساعه  بأم الخدر جار الدهر

اخيام اشتعلت نار
ياشبل الكرار
عزمك ماينهار
★★★★★
هليله   منك دنه  وحان الاجل
هليله  محد حظر من الاهل
هليله  فوگ السطح جثتك تظل
هليله    هز السمه بيك الحصل

وحشة وظلمه الدار   
ياشبل الكرار
عزمك ماينهار

الشاعر حسن لعيبي الحريشاوي